Fyrir þá sem ekki vita er gamlárskvöld á morgun!!! Ég hlakka voða mikið til, þar sem við verðum öll familían heima hjá mömmu og pabba. Og Ási minn ætlar að koma líka!

Við munum snæða dýrindis nautalundir með öllu tilheyrandi og örugglega gera eitthvað skemmtilegt.. fara á brennu eða spila eða eitthvað og horfá kvenna skaupið.. ég var að skoða eitthvað um skaupið í ár og það er víst leikstýrt af Eddu Björgvins.. og það lofar góðu .. ef hún heldur í gamla góða húmorinn sinn!

Kannski tekur pabbi lagið á hljómborðið og ég tek afríska mauraætudansinn með!

Ég trúi ekki að þetta ár sé að koma.. árið sem ég verð þrítug! Já ÞRÍTUG! en ég ætla ekki að vera á bömmer yfir því núna.. enda ellefu mánuðir og 10 dagar í það!

Annars segi ég bara gleðilegt nýtt ár 2006 og takk fyrir það gamla!

Munið að ganga hægt um gleðinnar dyr!

Nohh nýtt sakamál fyrir Erlend og Sigurð Óla.. eða það var það fyrsta sem mér datt í hug þegar ég sá þessa frétt, heyrði í útvarpsfréttunum að talið væri að parið hefði tekið of stóran skammt af eiturlyfjum.. sorglegt!

Annars er ég bara frekar lúin eftir vinnudaginn sem er ekki ennþá búinn.. búin að vera á öðru hundraðinu að vinna í allan dag og hlakka mikið til að fara heim og leggja mig pínulítið á eftir!

Ég var einmitt að vorkenna Einari bróður sem er líka dauðþreyttur núna í vinnunni að bíða eftir því að klukkan slái fimm en þá getur hann ekki farið heim að leggja sig. Nei.. það þarf að ná í börnin, sinna þeim og gefa þeim að borða og baða og hátta... AHHH hvað ég er að njóta þess að vera barnlaus akkúrat núna!

En minn tími kemur, jájá, þá verður þetta líka eitthvað almennilegt!

Gleðileg jól allir saman.. ef einhver er að skoða blogg um jólin! :)

Ég átti yndislega stund í gærkvöldi með fjölskyldunni, mér tókst að næstum "klára allt" áður en ég brunaði suður í fjörð til mömmu og pabba. Heyrði jólunum hringt inn á Rás 1 og svo "Góðir landsmenn gleðileg jól" klukkan sex!

Svo borðuðum við jólamatinn sem var hin árlega aspassúpa sem er alltaf jafn góð, svo lambalundir ásamt öllu tilheyrandi og svo ris a la mandel í eftirrétt.. þetta var fámennt en góðmennt, bara ég, mamma og pabbi og amma. Svo settumst við inní stofu og fórum að opna pakkana.. og við amma vorum með flesta pakka.. Ég fékk voða margt fallegt og er mjög ánægð með allt.

Síðan kíktum við til Einars og Lilju og stelpurnar voru ennþá í fullu fjöri eftir hamagang hjá hinum ömmu og afa og þær fengu pakkana frá okkur og svona. Ég fékk líka pakka frá Einari og Lilju og það var rosalega flottur trúður í rólu og grísahúfa! Ég á eftir að setja inn myndir af því!

Svo er jóladagur búinn að fara í leti og gláp og svo jólaboð sem var hjá systur hans pabba og núna vorum við Auður Aþena að koma heim til mín og hún ætlar að gista hjá mér. Gaman að fá að hafa hana smá á jólunum. Hún er að horfá Kalla á þakinu, leikin mynd frá 1974, talsett með mjög skemmtilegum röddum.....

Ég vona að allir hafi átt góð og gleðileg jól og eigi góðar stundir í vikunni!

Jii ég var að frétta að það er síðasti dagurinn til að vera seiv með að jólakortin berist fyrir jól í dag! Ég er alveg búin að vera utan við mig með allt þetta jólastússerí í des....

Ég keypti mér samt "jólaföt" á sunnudaginn, ákvað að kaupa mér bara gallabuxur og cardigan sem ég get notað dagsdaglega og verð svo bara í gömlum sparilufsum á jólunum! Svo fékk ég bakþanka í gærkvöldi og fór í Limalindina að gá að jólafötum.. en þá var bara ekkert í boði sem mér finnst smart! Ég meina vill fólk vera í blöðrupilsi og Sgt. Pepper jakka á jólunum?

Því segi ég enn og aftur, afhverju ekki jólajogginggallar?

Það er farið að snjóa jólasnjó.. ekkert smá kósí par excelans!

Ég er allt í einu í sjokki, það er 21. des og ég er ekki byrjuð á jólakortunum.. og á eftir að pakka inn öllu og þrífa.. en ég er í fríi á Þolla þannig að ég pakka bara þá.. ætla að skrifa á kortin eftir vinnu í dag og henda þeim í póst!

Annars nenni ég eigilega ekki að stressa mig á þessum jólum, bara slaka á og njóta þess að eiga langa helgi!

Jæja best að vinna, meika fé og spinna!
ojj ég er klígja, ég veit!

Ég fór í Leikbæ um helgina og fékk flashback dauðans, jú það var til svona Lumbí hús með allskonar húsgögnum fólki og dóti til sölu. Ef ég væri geðveikt rík þá myndi ég kaupa mér svona ég sver það.. mig langaði alltaf svo í svona þegar ég var lítil, það var einhver vinkona mín sem átti svona og maður gleymdi sér í þessu. Maður fór í svona fullorðins leiki.. og innanhús-arkítektaleiki, hanna nýjar stofur og svona.. Svo var maður að þykjast vera mamman og stjórna heimilinu eins og mamma. Ég man það var líka rafmagn í þessu, hægt að kveikja ljós og læti.

En ég fékk líka eitt lítið menningarsjokk og það er að nafnið á þessu húsi og dóti er greinilega misskilningur lífs míns.. því ég hef alltaf kallað þetta Lumbí en þetta heitir Lundby! hahaha!

Mig langar í LUMBÍ í jólagjöf!

Jæja ég varð að herma eftir Sigrúnu vinkonu og búa mér til dansandi jólagellu!

Smellið hér til að sjá jólagelluna 2005 dansa fyrir ykkur!

Ps. Smellið á 1 2 3 og tónamöguleikana í vinstra horninu til að sjá hana breyta um spor og takt!

Auglýsing:
Þau ykkar sem verða í jólafötum sem eru saumuð úr gömlum strigapokum eru boðin á jólaball í húsnæði Þykkvabæjarkartaflna ehf., á Hellu, á jóladag kl. 15.15.
Verðlaun verða veitt fyrir fallegustu múnderínguna.
Mætið stundvíslega.

Ég fer alltaf yfir um jólin... á krítarkortinuuuuu!
Þori ekki að kíkja í heimabankann, ég á eftir að kaupa alveg nokkrar gjafir.. sjæt!

Það er búið að vera svona leynivinaleikur í vinnunni þessa vikuna, rosa gaman. Ég hef aldrei tekið þátt í svona og vissi ekki að þetta væri til. En allavega þá dró ég nafnið á hressustu konunni í deildinni og er búin að vera að senda henni rímur og gjafir og svo heyrir maður hlátrasköllinn í henni, voða gaman. Og svo á morgun förum við öll í deildinni útað borða á Peðsa kofanum í hádeginu og þá eiga allir að giska hverjir eru vinirnir.. ég vona innilega að hún sé ekki búin að fatta að þetta sé ég! híhí En minn leynivinur kjaftaði óvart af sér í gær þannig að ég þarf ekkert að geta! :)

Jæja ég er að spá í að stíga inní óttann og fara inní heimabankann og tékka á bödjettinu..

Ný kynslóð vélmenna .....

Jæja þá er þetta allt að skella á samanber frétt á mbl.is.. vélmennin eru að verða að veruleika.. ég vissi alltaf að ég myndi ekki þurfa að skeina mér þegar ég yrði gömul, fæ mér bara eitt alt-muligt vélmenni til að sjá um það og hin heimilisverkin!

En eitt hjó ég eftir í fréttinni og það var;

Standa vonir til að eftir því sem hæfni vélmennisins eykst vaxi líkur á að það nýtist til skrifstofustarfa.

Hvernig á ég að hafa efni á einu slíku ef þau hirða af manni starfið líka! Iss...

Hvað er að vera býsna kot roskinn?

Það er eitt sem mér láðist að nefna varðandi síðustu bloggfærslu.. en það er með myndina af mér á kantinum á jólunum, ég get víst ekki látið eins og ég hafi gert þessa mynd, en það var listamaðurinn mikli hún mágkona mín, Lilja sem bjó til þetta listaverk. Þess má geta að hún tekur að sér að gera sniðugar jólamyndir til að setja í jólakort,það er einmitt sérstakt jólatilboð núna, aðeins 150 kr. pr. mynd!!

Helgin var sú fínasta, legið í leti, útað borða, bíó, sofa, afmæli hjá Önnu B, kúra og svo fór ég á jólaball í gær. Ekkert smá gaman, mér var boðið að koma með á jólaballið í leikskólanum hennar Auðar Aþenu.. Ég fékk alveg fílinginn beint í æð. Ég hef ekki farið á svona ekta jólaball síðan ég var 12-13 ára og skrökvaði að mömmu að konan við hliðina á mér væri með vörtur í hendinni svo ég þyrfti ekki að dansa í kringum jólatréð!

Mér þykir ótrúlega vænt um að hafa fengið að fara með og sjá Auði mína upplifa jólaball og jólasveinana og svo var Kristín Anna með líka auðvitað, í fínum jólakjól að reyna að spyrna sér á gólfinu, komin með tvær tönnslur og læti! Æji þær eru svo æðislegar þessar frænkur mínar! Myndir koma fljótlega.

Svo fór ég að þrífa í gærkvöldi í búðinni og fór svo heim og tók æði þar líka.. allt voða fínt heima núna. Svo loksins slappaði ég af yfir úrslitaþættinum í Americas Next Top Model 5 sem er ekki einu sinni byrjað að sýna hérna heima.. híhíhí.. en reyndar fékk ég óskemmtilegar fréttir um að næsti Lost þáttur vestanhafs kemur ekki fyrr en í janúar! En ég bíð bara róleg!

Nú eru bara 12 dagar til jóla.. tíminn líður hratt á gervihnattaröld!

Vá ég hlakka svo geðveikt til að sofa út á morgun, ekki að þurfa að vakna við píp í einhverjum vekjaraklukkum!!! Ahhh það er svo nooootalegt.. en samt verður maður að passa sig að sofa ekki of lengi þá verður maður heví myglaður fram eftir degi!

Samt er ég bara í stuði til að hanga heima undir sæng og glápa á eitthvað skemmtilegt! En maður kíkir kannski í jólageðveikina í búðunum.. ég er samt varla að nenna því.. það er betra að fara bara um kvöld á virkum, þar sem það er opið til 22 alla daga núna.. þá er frekar rólegt bara og maður getur hugsað!

Annars veit ég ekki hvort ég fari í jólaköttinn eða ekki.. mig langar dáldið í ný jólaföt.. en hvað ætti það að vera? Helst langar mig alltaf að vera bara í jogging galla á aðfangadagskvöld.. þar sem maður er alltaf vel saddur eftir matinn og óþægilegt að vera í sparifötum sem gefa kannski ekkert eftir! Ég er búin að gæla við þá hugmynd í mörg ár að láta sérsauma á mig jólajogginggalla. Kannski svona rauðan krumpugalla með hvítu loði á hettu og stroffum.. og rauða strigaskó.. mér finnst það bara cool sko!

Eða láta bara sauma einn svona galla í fullorðinsstærð!

Það væri fyndið að mæta í miðnæturmessu á aðfangadagskvöld í jólagallanum. Vill einhver koma með mér?!

Hérna má sjá mig í framtíðinni á jólunum heima hjá mömmu, sitjandi á kantinum:

Hvernig er það, er börn og fullornðir alveg hætt að nota endurskinsmerki? Ég er búin að taka þvílíkt eftir þessu að dökkklætt fólk og krakkar eru að læðast með fram og yfir götur í skammdegismyrkrinu hérna. Og í gær var ég næstum búin að þrykkja aftan á bíl sem var næstum því búinn að keyra á mann sem var að læðast yfir götu eins og skugginn sjálfur!

Ég fékk nú þessi forláta endurskinsmerki frá Sjóvá um daginn, ég held ég myndi nú nota þau ef ég væri eitthvað úti að labba.. en maður fer náttúrulega ekki fótgangandi neitt orðið, algjörlega háð bílnum orðin.

En ég veit nú svosem að það þykir ekki töff að vera með endurskinsmerki, en er töff að slasast eða deyja í umferðinni?

Annars var mín komin á fætur kl 7.30 í morgun og var búin í sturtu kl 8 og var bara í rólegheitunum að lesa Fréttablaðið og fá mér ristað brauð með osti og appelsínusafa og svo kaffi með mjólk.. ansi notalegt við rauða aðventuljósið inní eldhúsi að hlusta á Rás 1 .. nennti ekki að standa upp að breyta um rás.. enda bara notalegt að hafa smá sinfóníu og dánarfregnir og jarðarfarir.. svona eins og í den heima!

Svo er bara helgin á næsta leiti, það er ekki amalegt!

Og já ekki má gleyma afmælisbarni dagsins;

Anna Björns er dirty í dag!!
Til hamingju með daginn kæra vinkona! ;)

Ekki láta mig fara að æla... en ég verslaði í fyrsta skipti í nærfatabúðinni La Senza í Kringlunni áðan, ég var að kaupa einar skitnar nærbrækur á 890 kr. (kannski ekki skitnar samt..) og þegar ég fer að borga, þá nær gellan í einhvern fínan pappír, brýtur hann greinilega á einhvern spes hátt og pakkar svo brókinni inn og límir saman með límmiða sem er eins og lógó búðarinnar í laginu. Og svo var það nú alveg til að toppa það, hún setti kassastrimillinn í umslag merkt búðinni og rétti mér! sorry en... HAHAHAHA

Svo vil ég koma því á framfæri til allra sem búa til auglýsingar sem lesa þetta blogg, sem eru mjög margir sko; vandið ykkur í stafsetningunni!!!

Ég sá áðan hrikalegt, í sjónvarpsauglýsingu fyrir ævisögu John Lennon, þá kom stór texti á skjáinn:
DÓP OG DRIKKJA!

nei......

Í dag er góður dagur, þar sem ég komst í buxur sem ég keypti mér fyrir 3 mánuðum, keypti þær viljandi of litlar því ég ætlaði að grenna mig í þær hehehe.. og núna er greinilega þetta eins mánaðar sykurbindindi eitthvað að virka.. þar sem einhver mör er búin að leka af mér!

Ömurlegt að mjókka og fitna og mjókka og fitna endalaust.. samt alltaf gaman að mjókka.. því þá er alltaf eins og maður hafi unnið fataúttekt.. því þá kemst maður í gömul föt! Ég er einmitt að bíða eftir að komast í Oasis gallabuxur sem eru búnar að vera oní skúffu síðan í febrúar! Þær minnkuðu nefnilega í þvotti.. ég sver það! híhí

Ég var að fá gleðifréttir um það að við í deildinni minni fáum einn aukafrídag um jólin útaf þessum helgarjólum og ég fékk frí á Þorláksmessu!! Ekki amalegt!

Annars verður eitthvað tómlegt á aðfangadagskvöld, bara ég og mamma og pabbi og amma.. Einar og co. verða hjá tengdó þessi jólin en það verður bætt upp á gamlárskvöld en þá verða þau hjá okkur! Ég er ekkert byrjuð að kaupa jólagjafir og veit ekki neitt hvað ég á að gefa neinum og hverjum ég á að gefa.. fyrir utan familíuna!

Ég vona bara að það verði hvít jól.. það er svo rómó!

Jæja fólkenz.. eruði alveg að missa ykkur?? Nei maður spyr sig! hehehe :) Híhíhí

En ég ætla ekkert að skrifa mikið um það nýja í lífi mínu, maður vill nú ekkert jinxa það .. en til að segja hvað það er í MJÖG grófum dráttum, þá er ég búin að eignast góóóðan viiiiin eins og mamma myndi segja það! Eins og td. þegar fréttist að Lea frænka mín væri farin að slá sér upp, þá sagði mamma alltaf Lea og viiiiinur hennar .. sko en þegar hún kom var búin að koma og sýna hann stórfjölskyldunni heima hjá ömmu í sunnudagskaffinu, þá var það orðið Lea og Unnsteinn!

Þannig að ég ætla ekkert að vera að segja neitt frekar um vin minn sem ég kýs að kalla kærasta, fyrr en að þetta er komið það langt að ég geti farið að sýna hann ömmu og fjölskyldunni sem er ekki tímabært að svo stöddu!

En annars átti ég ótrúlega skemmtilega helgi, fór í 25 ára afmæli á föstudagskvöldið hjá stelpu sem ég var að vinna með í MR, hitti þar allar stelpurnar sem ég var að vinna með og við gátum rifjað upp fyndin móment á skrifstofunni og slúðrað pínku og mikið er ég fegin að vera hætt þar.. get ekki sagt annað!

Svo til að gefa frú Lilju frí frá hinni óhávaðasömu dóttur hennar Auði Aþenu, þá fórum við frænkurnar í sund og svo á pulsuveitingastaðinn okkar, sem er Snæland í lindahverfinu og svo í Limalindina.. um kvöldið var ég svo með vini mínum hehe, og við fórum á Saw II sem var frekar nasty og brutal mynd.. en ég hafði góða hendi til að kreista! :)

Svo á sunnudaginn var mér og Auði Aþenu boðið í 4 ára afmæli hjá henni Ásu Maríu sætu, sem og við fórum í og það var rosafjör.. svo var bara dúllerí um kvöldið :)

Ég bið forláts að hafa ekki bloggað í gær, ég veit ég á að gera það á virkum, en það var svo mikið að gera í vinnunni og líka um kvöldið og eigilega núna líka, ég er bara að stelast til að blogga hérna.. nóg að gera á þriðjudögum nebblega!

Svo var ég að fatta að jólin eru bara að koma!!!!!

Jæja það er aldeilis æsingurinn í fólkinu!
Passiði þrýstinginn! hehehe :)

Við skulum bara orða þetta þannig að:

Kannski er stundum farið að leynast köttur í bóli bjarnar!

Kannski er grísasteikin ekki eins pipruð lengur og hún er búin að vera í 4 ár......

Kannski breytti grísastelpan spaða áttunni í hjarta Ás!

En veriði alveg róleg yfir þessu! :)

Á föstudögum hérna í vinnunni er haldinn svokallaðar kökuklúbbur í kaffinu. Þá skiptumst við á sem erum í honum (og ég var skráð í hann annan daginn minn) á að koma með gúmmulaði á föstudögum. Og það er alltaf smekkfullt hlaðborð. Á morgun er fyrsti dagurinn minn í þessu.. ég er alveg í vandræðum, líka þar sem á að fara að endurskoða ráðningu mína um þessi mánaðarmót, þannig að það er eins gott að standa sig!

En þar sem ég er hætt í sykrinum... aftur... já ég er búin að sleppa sykri í mánuð núna, þá fer ég ekki að koma með einhverjar sykurbombur.. því mig langar í líka! Þannig að ég ætla að koma með ostasalat og snittubrauð og svo eina sykurlausa köku.. ef ég finn uppskrift! Maður verður nú að heilla kellingarnar uppúr skónum! :)

Annars er mikið nýtt að gerast í lífi grísastelpunnar um þessar mundir að ég er ekki að nenna að fara að pæla í einhverjum kökum í kvöld...

Já fyndið, það er svona jólaleikur starfsmanna hérna og deildin mín vann núna á mánudaginn og við fengum voða flotta vinninga, rauðvínsflösku, konfekt og nammi, 1 máltíð á Serranos, 5 tíma ljósakort og fría dvd á Bónusvideo! Mér finnst bara dáldið fyndið að fá þetta þar sem að ég er hætt að drekka, borða ekki nammi og má í raun ekki fara í ljós! hehehe.. en ég ætla samt að stelast í 1-2 tíma fyrir jólin.. þar sem ég er eins og hvítt lík í framan!

Túrílú!