Bubbi Morthens sagði víst í Idolinu síðasta föstudag að hann myndi fara í hárígræðslu ef einhver stelpa þarna myndi komast áfram.. og hún komst áfram. Og núna er búið að vera aðalumræðuefnið á Bylgjunni í dag og í gær, hvort hann muni standa við heit sitt. Þorgeir Ástvalds og þeir voru alveg að missa sig yfir þessu í síðdegisþættinum í gær, hringdu í Bubba og allt. Og núna áðan voru þeir að taka símaviðtal við einhver hárígræðslumeistara.. fyndið! Hann hefur nú alltaf verið þunnhærður hann Bubbi minn sem ég kýs að kalla Ásbjörn.. en ég sé hann ekki í anda með lubba!

Það er greinilega gúrkutíð!

Ps. vá hvað manni getur brugðið þegar það kemur einhver glæný týpa af prumpulykt hjá manni!

Afhverju var ég búin að bíta það í mig að "skuldar mér kók!" - frasinn væri íslenskt fyrirbæri??
Er að horfá Sex and the city og Carrie sagði þetta við Miröndu "you owe me a coke!"

Cool þema í þessum þætti annars, en hann fjallar um það að fólk í samböndum eða gift, spyr alltaf einhleypa fólkið hvort það sé að hitta einhvern eða um ástarlífið.. alveg magnað!

Ég held ég sé ekki búin að bögga neinn ennþá... ætla að passa mig!

Ég er alltaf að dreyma að ég sé í útlöndum og hef bara smátíma til að klára að versla og þá hleyp ég um stórborgir að leita af H&M búð og fer inní hana og er að leita að einhverju til að kaupa, einhverjum fötum eða gjöfum eða skartgripum! En ég finn aldrei neitt og ekkert passar og þetta er þvílíkt kapphlaup við tímann svo kemur alltaf einhver og grípur í mig og segir að flugvélin sé að fara og ég næ aldrei að kaupa neitt.

Kann einhver að ráða drauma?

Kannski eru þetta fráhvörf, því ég hef ekkert farið í fatabúðir eftir jól.. fékk algjörlega ógeð á þessum verslunarmiðstöðum hérna fyrir jólin .. sem er gott.. fínt að fá smá frí! En innri meðvitund mín er greinilega í rusli yfir þessu öllu saman!

Helgin var fín, Auður Aþena kom í heimsókn til mín og Ása á laugardaginn og hún hefur alltaf verið eitthvað pínu feimin við hann og pínu abbó held ég því hún hefur ekki lengur Önnu frænku sína ein, en allavega eftir daginn voru þau orðin mestu mátar og í gærkvöldi í sunnudagsmatnum þá var hann sko besti vinur aðal og lét hann lesa Litla svarta Sambó fyrir sig og búa til hús úr sófanum og voða fjör!

Annars var ég að vinna í fimmtugsveislu hjá vinafólki mömmu og pabba á laugardagskvöldið. Það var fínt, þannig séð, leið hratt tíminn og ég var á hlaupum allan tímann. Ekki amaleg veisla þar sem allt var löðrandi í hvítu og rauðu og fólk orðið vel kátt undir miðnætti en þá fór ég heim að horfá dvd með Ása mínum.. horfðum á Dark Water.. dáldið spúkí mynd!

Jæja best að vinna!

Vá það er langt síðan ég hef verið illa södd eins og núna. Fékk mér nefnilega heitt slátur og rófustöppu og kartöflumús og grjónagraut í hádeginu! Samt geðveikt gott... mmmm

En mig langar helst að vera heim að liggja útaf núna heldur en að sitja hérna í vinnunni, verð nú að segja það!

Annars kíkti ég í afmæli til Einsa bró í gærkvöldi og við fengum ljúfar Pizza Hut pizzur og læti! Hann var nú svoldið vanþakklátur með gjöfina sem ég og Ási gáfum honum. En þetta var svona mynd í ramma, bakgrunnurinn svona svart flauelsefni sem var búið að mála á haf og sólarlag með skærum litum.. ég skil ekkert í því afhverju hann hélt að þetta væri eitthvað grín. En svo var hann ánægður með peysuna sem ég gaf honum líka...

Auður Aþena fékk eldhúsinnréttingu í jólagjöf með eldavél, ísskápi og vaski og var allan tímann að elda inní eldhúsi.. ég hef nú ekki fúlsað við svona þegar ég var lítil.. rosa flott!

Annars er bara helgin að koma sem er gott og ég hlakka svo til að fara að sofa í kvöld og þurfa ekki að vakna við eitthvað píp í fyrramálið, heldur bara að vakna þegar ég vakna!

Góða helgi!

Einar bróðir er 25 ára í dag!!!!!!!!

Til hamingju kæri bróðir.. hlakka til að þig í kvöld og gæða mér á gómsætum peðsum!
Nenni ekki að skrifa ræðu núna.. sorry!

Allt er nú til, heimasíða sem fjallar um húðvandamál fræga fólksins:
Skinema.com = eins og cinema.com.. lol

Hvaða bloggari af guðs náð kannast ekki við það að hafa verið með eitthvað svo sniðugt í hausnum til að blogga um. Liggja uppí rúmi alveg að sofna og með alveg brilliant pistil og hugsa; "já þetta ætla ég að skrifa um á morgun" ... svo sest maður við tölvuna daginn eftir og rámar ekki einu sinni í hvað var svona djöfull sniðugt uppí rúmi í gærkvöldi! Já ég er í svoleiðis aðstöðu núna!

Ég er annars búin að komast að því að ég er svona "leiðinda parakelling" eins og ég hélt ég væri ekki orðin og hef alltaf haft mikla fordóma gegn svona stelpum sem hætta að hringja í vinkonur sínar þegar þær eignast kærasta. Ég er þannig, þótt mig langi það ekki. Ég hef reyndar ekki þessa þörf fyrir að vera úti að gera eitthvað með vinkonum mínum öll kvöld eins og í den. Þegar maður var friðlaus heima heilt kvöld.. þá varð alltaf eitthvað að vera í gangi, verið að hanga heima í herbergi hjá einni, eða hanga útí sjoppu eða opið hús í Seljaskóla 2svar í viku. Svo þegar maður var orðin aðeins eldri þá tóku kaffihúsin við og keila og billiard og rúnta og bíó og allskonar..

Núna er maður greinilega orðin aðeins eldri og latari og finnst bara fínt að vera heima mörg kvöld í röð að gera ekki rassgat. Nema að maður er náttúrulega kominn með heimili, það þarf að þrífa, þvott þvotta, elda og ýmislegt. Svo er maður að vinna, svo er ég í félagsskap utan vinnunnar sem getur tekið 2 tíma á dag.. og svo loksins þegar maður hefur heilt kvöld eftir vinnu að gera ekki neitt, er það svo ljúft að slappa af og gera ekkert. Ekki misskilja mig, mér finnst líka alltaf gaman að fara út og hitta vinkonur og fjölskyldu en það er oft svo erfitt að drulla sér í þann gír að drulla sér út.

Hvernig verður þetta þá þegar maður eignast krakka, þá kemst maður bara örugglega ekkert neitt.. sérstaklega þegar maður er kominn útá vinnumarkaðinn aftur..

Já krakkar mínir.. ég gat skrifað helling án þess að hafa ætlað að skrifa þetta.. og ennþá er ekki þetta rosalega sniðuga sem ég var að hugsa um í gærkvöldi komið í kollinn á mér! En ef það skýst sem elding niður í haus minn skal ég hripa það niður og skrifa um það... það er að segja ef mér finnst það ennþá eitthvað sniðugt!

Ég varð að stela þessari mynd af síðunni hans Kjartans, það er kannski eitthvað í þessu? Og já þetta er heili þarna en ekki fóstur eins og mér sýndist fyrst hahaha.. enda væri það dáldið fáranlegt ef karlmenn gætu gengið með barn að það myndi vera neðst í drjólanum á þeim. Það gæti verið svoldið óþægilegt fyrir þá þegar líður á meðgönguna. En þá fengju þeir samt tepokatyppi eins og konur fá tepokabrjóst og slappan maga eftir barnsburð! Híhí dáldið sick pæling en samt.. hahahha!

Annars vil ég þakka Pétri vini mínum fyrir mikinn áhuga á sambandi mínu og Ása, hann er alveg yfir sig spenntur og vill fá sögu um það hvernig við kynntumst.. ég verð nú að bera það undir drenginn hvort hann samþykki að slíkt verið skráð á spjöld alheimsvefsins! Við allavega kynntumst og smullum saman og erum heví ástfangin! Og ég held það séu svei mér þá 2 mánuðir og 2 dagar í dag síðan við hittumst fyrst!

Og núna erum við byrjuð að búa saman, deilum saman bíl, eigum von á barni og ætlum að kaupa okkur hús í Grafarvoginum í vor.. nei djók, smá ýkt en fyrstu 2 atriðin voru ekki ýkt! :)

Jæja vinna meira, eyða minna! eða eitthvað..

Búbú nýkominn úr baði!

Samkvæmt baggalút var Búbú valinn kynþokkafyllsti karlinn! Mér finnst hann alveg eiga titilinn skilið, frekar en Logi Bergmann eða Maggi Skef! Þetta minnir mig á þegar ég fór með frænkum mínum á konukvöld Létt 96,7 í fyrra.. guð minn góður; never again! En þar var einmitt upplýst um kynþokkafyllsta mann síðasta árs.. og það var einhver menntaskólastrákur, Þorvaldur Davíð minnir mig að hann hafi heitið, snáðinn sá var ekki með eitt bringuhár! Það þykir mér ekki kynþokkafullt.. hann var bara svona sætur strákur fyrir einhverjar menntaskólapíur.. en ekki fyrir valkyrjur eins og mig sjálfa! Ég vil hafa menn loðna og þess vegna er ég mjög sátt við Búbú!

En ein mesta letihelgi ársins, hehe alveg þriðja helgi ársins, er liðin! Það var bara mikið legið uppí sófa að glápa á eitthvað.. og svo þvoði ég svona 8 þvottavélar og þorði í fyrsta skipti að nota þurrkarann niðrí þvottaherbergi sem ég á víst 1/10 hlut í! Og hann bara svínvirkar, ég held ég eigi ekkert eftir að hengja upp þvott aftur, þvílík snilld!

Svo á laugardagskvöldið var hið árlega þorraboð hjá mömmufjölskyldu og dró ég Ása með til að hitta allan skarann í fyrsta skipti. Það gekk nú bara vel og hann var algjör dúlla að reyna að læra hverjir voru hvað og hvað allir hétu og hvernig þeir voru tengdir.. ég hefði nú ekki boðið í það sjálf! Svo var mjög fyndið þegar Bjössi bróðir hennar mömmu tók Ása greyið á beinið.. "og hverra manna ert þú?" og svona spurningar.. þá held ég að minn hafi svitnað í lófunum! Pabbi er svo líbó að hann hefur nú ekki verið með svona yfirheyrslu hehe!

En ég hlakka bara núna til næsta laugardags að sofa út.. ég er alveg handónýt í því að vakna á morgnana.. ekkert nýtt ég veit.. en þetta verður bara verra og verra! Fara fyrr að sofa!

Ok ég er ennþá að jafna mig eftir komment frá síðustu færslu.. sem segir að bloggið mitt hafið dalað eftir að ég eignaðist bónda.. oj ég ætla að vona að ég verði ekki svona leiðinda parakelling.. en ég náttúrulega get ekki vælt yfir karlmannsleysinu lengur :) mér til mikillar ánægju!
Ég get heldur ekki rövlað um hvað það er mikið af ógeðum og fríkum á einkamál.is .. hvað á ég þá að rövla um?

Ég get sagt ykkur að ég fór í lindina um daginn sem kennd er við Lim sem er ekki í frásögur færandi, nema það að allt í einu tek ég eftir konu sem er að labba fyrir framan mig á ganginum. Hún var ekki há í loftinu, kannski 1.60 cm og bara samsvaraði sér nokkuð vel sýndist mér... NEMA... hún var í svona old-skool skíðasamfestingi!! Hann var hvítur með mintugrænum línum! Og hann var nokkrum númerum of lítill! Þannig að hann skarst bæði upp í pjöllu og rass!

Hvað er að ? Eiga sumir bara ekki spegla eða er þeim bara drullusama? Hver fer í skíðagalla í verslunarleiðangur í Smáralind? Hver var þessi kona? Ég hefði ekki verið eins hissa ef hún hefði verið af erlendu bergi brotin, td. frá austan-tjaldslöndum, en nei.. þetta var íslensk kona!

En þar sem allt virðist vera leyfilegt í tískunni nú til dags, þá hefur þetta þykir kannski töffað, svona vintage! Ég meina.. það er örugglega hægt að kaupa sér svona galla í Spútnik!
Kannski er þetta bara í tísku.. ég meina.. ég hef aldrei komið í Bláfjöll.. aldrei farið á svigskíði.. átti bara gönguskíði þegar ég var 7 ára.

Það þótt nú ekki töff að vera á gönguskíðum þegar við fluttum til Íslands 1984.. hér var svigskíðatíska.. en í Noregi voru allir á gönguskíðum og sparksleðum! Maður ætti kannski að láta senda sér einn svoleiðis og vera í svona grænum og bleikum samfesting að renna sér á sleðanum meðfram Miklubrautinni!

Svo verður Einar bróðir 25 ára í næstu viku og ég er búin að panta handa honum einstaklega flott skíða átfitt handa honum, sem er saumað úr bláu flísefni sjá hér:

Haldiði að hann verði ekki töff á snjóbrettinu?!

Bóndadagur á morgun!!

Jiii ég var að heyra í lesnum auglýsingum að það er bóndadagur á morgun! Og þar sem ég telst nú "eiga" einn slíkan núna, þá verður maður nú að kaupa eitthvað handa honum.. kannski nýja hrífu eða mótór í traktorinn!

Annars vil ég halda í þessa íslensku ástardagana, þeas. bónda og konudaginn, en tek ekki þátt í hinum krípíngslega Valentínusardegi.. þótt ég hafi einu sinni verið með Prins Valentínusar klippingu!

En þar sem ég gaf mínum bónda blóm fyrir viku, ohh ég er svo rómó, þá ætla ég að gefa honum eitthvað annað.. hmmm.. gamangaman! :) Ég elska að gefa gjafir, ég er alltaf að skoða eitthvað handa öðrum þegar ég er í Limó og Kringlunni.. og stundum eitthvað handa mér!

Annars er ég í stuði til að leggja mig beint eftir vinnu, ég vaknaði nebblega kl 6.45 í morgun með bóndanum og fór svo ekkert aftur að sofa, neinei ég fór að skipta um nafn á bjöllunni og póstkassanum og í tölvuna.. jájá svona gerast hlutirnir hratt á gervihnattaröld.. ég næ kannski gamla markmiðinu mínu bara.. að vera búin að eignast barn fyrir þrítugt!
Múhahahhahha!

Jæja, maður er ekki alltaf með á nótunum.. já þá er ég ekki að tala um einhverja tónlistarnótur.. neinei heldur fréttanótur my friends, newsnotes!

Tvær sem vinna með mér voru að segja rétt áðan "..hann var bara heppinn að drepast ekki" og ég bara; "hver þá?" þær bara díses.. "nú hann Steingrímur!" ég hugsaði; "hmm Denni eða?" neinei.. fór ég þá inná mbl.is og sá bara að Steingrímur J Sigfússon lenti í hrikalegu slysi í FYRRADAG!

En annars þá skutlaðist ég aðeins heim áðan til að ná í Zovirið mitt, því ég var að finna fyrir frunsustingi.. sem er mjög fúlt núna því maður á orðið kærasta.. annars skiptir einhver frunsudrusla engu máli þannig séð.. þótt hvimleiðar þær séu!

En allavega það sem ég ætlaði að segja og tekur mig heila eilífð að koma að greinilega er það að ég fór á klósettið í leiðinni og þar mætti mér bara hvítt pappírsflóð. Neinei haldiði að nýji stjúpsonur minn, hann Brandur, hafi ekki náð í klósettrúlluna og búinn að tæta hana allar í tætlur útum allt baðherbergið! Undir venjulegum kringumstæðum hefði ég tjúllast yfir þessu en í staðinn þá gat ég ekki annað en farið að hlæja og gat ekki skammað greyið.. pappírstætlur um allt!

En ég veit líka hver fær að þrífa þetta og það verður ekki grimma stjúpan hún ég!

Ég fékk hláturskast inní mér í dag í vinnunni. Ég var bara eins og ég geri þúsund sinnum á dag að skoða viðskiptamannaspjald í Concordinum og var með opið spjald hjá fyrirtæki sem við skulum kalla Xxx ehf. og þá rak ég augun í netfangið hjá tengiliðnum í því fyrirtæki. Og það var:

trudur@xxx.is

Ég varð að deila þessu með einhverjum, en enginn sem gæti fattað þennan húmor var inná msn, þannig að ég hringdi í Lilju mágkonu og hún sprakk úr hlátri. Konan sem ég vinn við hliðina á fannst ég hinsvegar asnaleg og fannst þetta ekkert fyndið. En ég veit að Önnu B á eftir að finnast þetta brjálæðislega fyndið, enda með trúðahúmor eins og ég.

Ég meina.. ég meina hefði ekki verið í lagi að hafa h með í þessu, þar sem greyið manneskjan heitir Þrúður.. hahahahhaha!

Rétt upp hendi sem finnast þetta fyndið!

Er kominn tími til að færa sófa?

Færðu stundum næturgesti? Veistu ekkert hvar þú átt að láta þá sofa? Ég er með snilldarlausn á því vandamáli!! Því til sölu er fallegur vínrauður svefnsófi úr Habitat! Rúmgrindin er 120x200 cm og geta 2 fullorðnir hæglega sofið þar værum blundi.. þetta er td. sniðugt í sjónvarpsherbergið sem með þrem handtökum getur breyst í gestaherbergi!!

Endilega ef þér vantar svona sófa eða veist um einhvern sem er í leit að svefnsófa sendið mér tölvupóst og ég mun hafa samband um hæl... eða tá!

Kv. Grísastelpa aka. Anna sem breytti yfir í Latadrengsófa!

Ps.1. Mér er fúlasta alvara!
Ps.2. Ný könnun!

Jæja.. maður þorir ekki öðru en að hlýða þegar Solla byrjar að heimta blogg hehe.. segi nú bara svona!

Ég er komin í vinnuna aftur og er mjög feeeegin. Ég var lasin mið-fös í síðustu viku og var sumsé heima í 5 daga í röð með helginni semsagt og ég var alveg komin með nóg af sjálfri mér og mínum haus í gær. Er búin að vera eirðarlaus og skapstygg, eymingja Ási minn.

En núna er ég komin í rútínuna mína aftur og þá vonast ég til að batna í hausnum og ætla að vera dugleg að rækta sjálfa mig á næstunni. Fara í afruglun niðrá Héðinsgötu og slíkar meðferðir hehe!

Kíkti í smá heimsókn til Önnu Bé í gær, en hún var útí Hollandi um jólin og keypti handa mér flottar gallabuxur, flotta bleika eyrnalokka og augnskugga! Svona svartar þröngar gallabuxur en ekki alveg niðurmjóar.. en mig langar ógeðslega að fara í svona hnéfitusog eins og þær fóru flestar í í Svaninum.. eða bara fara að hreyfa mig... eða bara vera stolt af minni hnéfitu!

Ég skil ekki stundum verðlagningar.. eins og hérna í mötuneytinu í vinnunni á morgnana, þá kostar rúnstykki með áleggi 130 kr. en ein brauðsneið með áleggi 100 kr. ?!?! En hver annar en ég er að pæla í því? hehe

Ég drekk bara kaffið góða hérna frítt úr jólakönnunni minni.. mig langar samt í svona hitakönnu því ég leifi (skrítið að skrifa það) eigilega alltaf 1/3 úr bollanum því ég næ ekki að drekka það meðan það er heitt.. Lilja er búin að bjóða mér sína en ég gleymi því alltaf! Svo held ég að fólkið hérna á skrifstofunni haldi að ég sé klikkuð...

Ég nefnilega lendi stundum í því að ég er að ná mér í kaffi og rúnstykki og kaffi handa konunni sem vinnur við hliðina á mér og ég þarf að opna eina þunga hurð á leiðinni tilbaka. Og það var eigilega ekki hægt með allt þetta í höndunum.. þannig að ég fór í Ikea og keypti svona lítinn þjónabakka.. og þegar ég er að ná í mikið er ég með allt á bakkanum og held á honum með einari og opna hurðina með hinari.. ég meina maður verður að bjarga sér!

Jæja er þetta ekki orðið fínt á mánudagsmorgni, Solla mín? :)

Ég og Ási fórum á Hostel áðan í bíó. Og nú er komin pása á hryllingsmyndir fyrir okkur. Þessi mynd er frekar krípíngsleg og þá er ég að tala fyrir utan blóðsúthellingarnar í henni. Bara hugmyndin á bakvið þetta er viðbjóður. Það kæmi mér heldur ekki á óvart að svonalagað væri til í heiminum, að einhvert forríkt fólk sem veit ekkert hvað það á við peninginn sinn að gera, kaupi sér svona sick "þjónustu". Eins og fólk man kannski líka eftir í myndinni 8mm með honum Nikka Búri vini mínum.. það var svona svipað concept. Ég þori ekki að fara útí details með Hostel þar sem einhver gæti átt eftir að sjá hana..

Það er samt heilmikill húmor í myndinni fyrir hlé, og þar var bestur Íslendingurinn Óli sem var leikinn af alvöru Íslendingi til tilbreytingar og talaði hann íslensku stundum.. og var mjög fyndinn, of course my horse!

En núna erum við að róa okkur niður fyrir svefninn og rakst ég á þessa fyndnu mynd hér að neðan og ætla að láta hana fylgja með, fyndnast finnst mér að Spiderman skuli vera með í þessum dansflokki:

Ps. var að setja inn jólamyndir í albúmið fyrir þá sem hafa áhuga!

Vinsælasti klósettpappírinn í dag!

Tekið af mbl.is

Mús kveikti í húsi

Bandarískur maður kastaði mús, sem hann hafði fundið í húsi sínu í hrúgu af laufi sem hann var að brenna. Músin stökk hins vegar logandi inn í húsið aftur og kveikti í því.
Luciano Mares, 81 árs gamall, sem býr í Fort Sumner í New Mexico, fann mús í húsi sínu og vildi losa sig við hana. "Ég var að brenna lauf fyrir utan svo ég kastaði henni á eldinn en músin stökk logandi út úr eldinum og inn í húsið aftur," sagði Mares.
Juan Chavez, slökkviliðsstjóri, sagði músin hefði hlaupið undir glugga. Eldurinn komst í gluggatjöldin og breiddist síðan hratt út og á endanum brann allt sem brunnið gat. Engan sakaði nema músina.
"Ég hef orðið vitni að mörgum húsbrunum en þessi er sá undarlegasti," sagði Jim Lyssey, slökkviliðsmaður.
____________________________

Þetta kennir manni að vera góður við alla.. því maður veit aldrei hvaða hefnd maður gæti átt von á! hehe..

Ég gerði reginmistök í gær ef einhver skyldi hafa tekið eftir því.. en ég kallaði Pirrý Sirrý.. auðvitað átti að standa Pirrý..

Annars er ég að deyja mig langar svo í brún stígvél og brúnt belti, og mig langar líka að vera brún því ég er eins og liðið lík á fimmta degi..

..veit ekki hvort það sé útaf því að í gærdag var ég að drepast úr hausverk og flökurleika og var komin með mígreni þegar ég kom heim. Svaf til að verða átta, fór svo aftur að sofa um miðnætti með hausverk og hann var ennþá kl 2 í nótt og þá tók ég þriðju mígrenispilluna og svo þegar ég vaknaði í morgun var ég eins og Marilyn Manson í framan, skjannahvít með svarta bauga þar sem ég gleymdi að þrífa maskarann í gærkvöldi..

Ég í morgun án gleraugna

Haldiði að það sé útlit á manni.. og núna er ég dökkhærð og hvít, í bláum rúllukragabol og mér líður eins og uppvakningi í lúðrasveitabúningi...

Ég í miðjunni

En mig langar sem sé að vera frískleg og fín... þannig að ég ætla að skreppa í ljós í kvöld.. þar sem ég á nú víst eitthvað 5 tíma ljósakort.. reyna aðeins að hressa uppá kellinguna!

Ég hef verið að spá í einum texta í lagi með Bubba Morthens en hann er svona:
"þú ert stjarna í myrkri, þú ert stúlkan mín, þú hefðir verið flott á 15. ööööld!"

Fyrirgefið en... ef einhver karlmaður myndi segja að ég hefði verið flott á 15. öld myndi ég nú ekki taka því sem hrósi.. allavega ekki ef ég liti út eins og Íslendingur á 15. öld!

Og hvað er málið, ég fór inní mötuneyti í morgun að ná mér kaffi eins og ég er vön að gera, og þar er alltaf stillt á Bylgjuna held ég og þið gætuð aldrei giskað á hvaða lag var verið að spila!!! Jú það var franska framlagið í Eurovision 1990, eða Black and White blues.. ég man þetta bara af því að ég á þessa plötu!

Annars hef ég ekkert meir að segja og þetta blogg er orðið hundleiðinlegt, ég veit það.. ég er voða löt við þetta um þessar mundir!

Ætti ég að hætta á toppnum eins og Sirrý?
Eða láta þetta dala út með lélegum bloggfærslum?