Það er aldeilis selskapslífið á mér um þessar mundir og alltaf eitthvað með vinnunni. Í kvöld erum við konurnar á skrifstofunni að fara útað borða af því að ein er að hætta á morgun. Og ætlum við að fara á Apótekið, ég hef nú bara farið þangað að fá mér kaffisopa hingað til og er soldið spennt yfir því að fara út að borða þarna.

En svo var ég að skoða matseðilinn og finnst hann heldur framandi fyrir mitt leyti. Skoðið hér. En ég er að hallast að folaldalundinni eða nautalundinni (fyrst ég er ekki að borga híhí) .. en finnst ykkur þetta ekki framandi matseðill? Þetta er mjög spennó!

Svo annað kvöld er sko Keilumót hjá vinnunni og það verða veitt verðlaun fyrir bestu liðsbúningana og held ég að hin liðin verði að vera ansi flott til að toppa okkur hérna á skrifstofunni. En við verðum í sérsaumuðum skær-neon-bleikum tjull pilsum og í skærbleikum bolum með mynd af hauskúpu og liðsnafninu sem er The Mean Team! úúúú og fyndnast er að það er einn strákur í liðinu híhí!

Ég hef ekki farið í keilu síðan Ómar hafði hár, þannig að ég veit nú ekki hvernig ég verð. Ég er mest hrædd um að festa puttana í götunum á kúlunni og hendast með henni inná brautina... það væri örugglega mjög fyndin sjón.. en kannski ekki mjög fyndið fyrir ástandið sem er á manni!

En já djöfull hlýt ég að vera mikill menningarpúkólingur því ekki er ég að gráta yfir þessari kárahnjúkastíflu í dag og ekki ætla ég að slökkva öll ljósin klukkan 22.00 í kvöld.. ég veit ekki einu sinni afhverju það á að gera það.. en mér skilst að það sé eitthvað útaf einhverju leiklistardæmi.. þannig að ég býst við að það verði bara dimmt í 101 Reykjavík með allri virðingu fyrir listafólkinu sem býr þar! :)

Jæja best að vinna smá áður en ég fer heim! :)

Mynd af mér á bumbunni, 16 vikur og 4 dagar.

Jæja ég er ekki að standa mig á þessu bloggi greinilega.. Mér finnst ég bara aldrei hafa neitt að segja.. en núna get ég sagt frá einhverju þar sem ég skellti mér á Bó og Sinfó um laugardaginn í boði mömmu og pabba og Alcoa!

Og ég er að segja ykkur að það var ÆÐI! Ég hef nú aldrei leynt mínum tónlistarsmekki og játa það fyrir alþjóð að kallinn er flottur! Og ég upplifði þvílíkt tilfinningaflóð þarna, grét af gleði og titraði af spenningi.. og lögin voru æði. Nú langar mig alltaf að fara þegar það eru svona hljómsveitir og sinfó.. verst að ég er nú búin að missa af allnokkrum!

Svo fórum við skötuhjúin útað borða eftir tónleikana á sóða/nýbúabúllunni Café Victor þar sem ég var að fá einkaklúbbskort og það er 2 fyrir 1 alla daga þar! Geðveikt góður matur skal ég segja ykkur og ég var orðin svo södd og átti ennþá helminginn eftir og píndi alveg oní mig.. svona spagetti carbonara með hvítlauk, beikon og parmesan.. Slurpp.. +

Svo í gær skutluðumst við austur fyrir fjall í Ölfusborgir að heimsækja foreldra hans Ása sem eru þar í bústað í viku.. þar fengum við dýrindis kjúklingarétt og svo allar tegundir af konfekti og pönnsur og fórum þaðan afvelta um fjögur leytið. Þá fór mín bara heim og lagði sig í 2 og hálfan tíma... svo um kvöldið ákváðum við að hita upp lasagne sem tengdó vildi endilega gefa okkur.

Nema það að þetta lasagne var frá fyrirtæki sem ég hefi nú ekki haft miklar mætur á en það er Kjarnafæði! Svo eftir 40 mínútur þegar þetta var loksins tilbúið, settum við þetta á diska og þetta var gjörsamlega óætt! Ekki var það þó útrunnið.. nei þetta var bara eins og einhver hundamatur á bragðið, eða jafnvel eins og maður gæti ímyndað sér að gamalt hundahakk myndi bragðast, oj bara.. mæli ekki með því!

Annars gekk bara vel í mæðraskoðunni um daginn og gríslingurinn alveg á milljón þegar við fengum að hlusta á hjartsláttinn, sem var alveg magnað! Og bumban stækkar, er alveg á leiðinni að fara að skella inn eins og einni mynd af mér bráðum! :)

Ef þú fílar svartan klikkaðan húmor þá skaltu sjá Clerks II sem er í Smárabíó núna. Þvílík snilld enda gerir þessi maður, Kevin Smith, bara snilldarmyndir!

Annars var bara fínt þarna á föstudagskvöldið, gaman að fara þarna í Laugar Spa... allt öðruvísi þessi lyktargufuböð en ég var búin að ímynda mér. Fórum fyrst í eitthvað með mintulykt og svo í sítrónuilm.. það var eins og að vera inní ofni með sítrónukökum, og svo í menthol lykt, svo í heitan pott, ég lagði nú ekki í að fara ískaldan sjópott.. maður verður nú að hugsa um krílið inní sér, það fengi örugglega áfall að fara svona úr hita í ískalt.. svo slappaði ég aðeins af í lazyboy salnum. Mér fannst samt dáldið pínlegt þar, því maður kom inn og nokkrir lágu þarna og það var alveg svona þögn með smá nýaldarmúsík og snark í arineldi sem var í miðjunni, en svo þegar ég settist í leðurstólinn þá brakaði þvílíkt í honum.. ég þurfti alveg að mana mig í að standa aftur upp því það var sofandi maður við hliðina á mér!

Svo fórum við á Austur Indíafélagið.. já eins og ég segi þá fannst mér nan brauðið best.. hitt var óþarflega sterkt fyrir minn smekk og fyrirgefið en hverjum finnst ísköld græn mintumangósósa góð? Úff.. eins og fljótandi spearmint tyggjó á bragðið. Svo eftir matinn skelltu allir í sig Beilís og ærisjkoffí en ég fékk mér bara ís með rjóma og súkkulaði sósu! :) Svo fór ég bara heim.. en hinar skruppu á skrall! Enda var ég dauðuppgefin eftir þetta allt!

Svo á morgun förum við í 2. mæðraskoðun og fáum loksins að heyra hjartsláttinn í krílinu, það verður nú gaman! :)

Ég er að fara í Laugar Spa í kvöld og útað borða svo á Austur-Indíafélaginu með konunum úr vinnunni í kvöld!! Það verður örugglega voða gaman.. ég vona bara að ég sofni ekki í lazyboy í slopp þarna niðrí Laugum.. þar sem ég er alltaf dead á kvöldin, hvað þá svona í lok vinnuviku!
En gaman að prófa 2 nýja hluti á sama kvöldinu..ég hefi aldrei farið þarna á A-I, vona bara að það sé ekki alltof sterkur matur!

Bumban mín stækkar óðum.. þannig að ég er nú alveg farin að líkjast óléttri konu! Þótt sumir haldi örugglega bara að ég sé feit með stóran maga! Ég ætla samt passa mig að detta ekki í eitthvað stanslaust át svona þegar lystin er öll að koma til.. maður fer ekki í einn kfc-borgara á dag eins og sumar ónefndar vinkonur duttu í hérna um árið!

Jæja vinna..

Jæja núna er haustið þokkalega skollið á með tilheyrandi veðri og kvöldin orðin dimm og tími til að kveikja á kertaljósum. Ég reyndar gleymi því alltaf að kveikja á kertum.. en þið hin getið gert það bara!

Verð að segja frá dulitlu sem mér finnst geðveikt fyndið en málið var að það var svona kaffiboð heima hjá m&p um helgina í tilefni af afmælisdegi afa míns sem dó fyrir 9 árum, nú sem er ekki í frásögur færandi nema að allir áttu að koma með eitthvað og allir komu með sætar kökur.. þannig að maður var í hálfgerðu sykursjokki þarna.. en engu að síður góðar kökur. Svo vorum við eitthvað að tala um þetta þegar allir voru farnir að það hefði nú alveg mátt vera eins og einn brauðréttur.. en þá sögðu mamma og pabbi mér fá brjálæðislega fyndri tilviljun!

En það var þannig að vinafólk þeirra var að fara í svona boð með 4 öðrum hjónum og allir áttu að koma með eitthvað með sér.. nema það að allir komu með flatkökur með hangikjöti! hahahahaha :) vá það þarf ekki mikið til að kæta mann..

Jæja svo ákváðum við pabbi að skella okkur í bíó saman um kvöldið. Við fórum á United 93 sem var dáldið átakanleg en mjög góð mynd. En ég get ekki sagt það sama um bíóið sem við fórum í, guð minn góður sko! Þetta var Sam-bíóin í Mjódd eða Bíóhöllin fyrir þá sem muna langt. Nema það að þessi mynd var búin að vera í sýningu í heila viku og strax komin niðrí sal B niðri! Sem er eins og skókassi með tjaldi sem er ekki mikið stærra en sjónvarpið hans pabba. Salurinn var troðfullur og loftræstingin biluð. Þannig að hitinn og svita/mannafýlustækjan var að gera útaf við mann. Og svo þegar við fórum út þurftum við að labba upp stiga sem var með pissufýlu og rusli og drasli og brotnri steypu í tröppunum! Sorry en þetta bíó er bara orðið hið versta Harlem bíó!

Og ég tala ekki um hvað það er fáranlegt að maður þurfti að borga það sama fyrir að vera í þessum viðbjóði og að fara í geðveikt fína og stóra sali td. í Smárabíó!

Ég segi púú á Harlem Bíó Mjódd!

Annars er ég bara ýkt hress á kantinum! :)

Smásaga

Eitt sinn fyrir ekki svo margt löngu hitti ég trúð. Hann sagði mér sögu sem ég vissi ekki hvort ég ætti að taka mark á. Sagan var um dverg sem var vanur að hrella ungar dömur sem áttu heima í kjallaraíbúðum þegar þær væru einar heima, hann hefði meira að segja drepið eina nýlega.
Svo hitti ég konu sem hét Þrúður og sagði henni frá hittingi mínum við trúðinn og söguna sem hann sagði mér. Hún sagði að þetta væri bull og að ég ætti ekki að taka mark á þessum trúði.
Svo eitt laugardagskvöld í nóvember var ég ein heima í kjallaraíbúðinni minni, þá heyrði ég að það var bankað á gluggann í stofunni, ég leit út en sá enga hræðu fyrir utan. Rétt eftir að ég var sest aftur í sófann með poppskálina og búin að ýta á play á dvd spilaranum, heyrði ég að það var bankað á eldhúsgluggann.. ég fékk sting í hjartað og hljóp fram, kíkti út og sá bara lítinn skugga í birtunni frá útiljósinu.. eina sem ég hugsaði í skelfingu minni var; trúði ég trúði eða trúði ég Þrúði?

Í gærkvöldi spurði ég Ása hvort ég væri orðin svona gömul eða hvað? Ég er alveg tilbúin að viðurkenna að ég get ekki vakað til 1 til að horfá Rockstar í beinni, en í gærkvöldi duttu af mér allar dauðar lýs þegar ég sá að endursýningin var ekki fyrr en 22.30 .. og ég bara gaaaaat ekki vakað lengur. Horfði á þáttinn á undan og fór svo að sofa! En ég verð nú að reyna að þrauka og horfá lokaþáttinn í næstu viku, fyrst að kallinn er í honum! :)

Annars með afmælið þá veit ég ekkert ennþá.. ég get allavega ekki haldið uppá það heima hjá mér, alltof lítið pláss! Kannski maður verði bara að heiman eins og gamla fólkið.. þar sem við erum að spá í að skella okkur í aðeins heitara loftslag þarna um mán.mótin okt nóv! :) Æji ég nenni ekki að velta mér uppúr því núna!

hey það er rigning og myrkur og meinlitlir skuggar á Mýrdalssandi og ekki skjól að fá, það er yfirgefinn bíll útí vegarkanti og hræðu neinsstaðar að sjá! Magnað lag!

Vá hvað ég er tóm.. eins og bara ekkert hafi á daga mína drifið, enginn pirringur, engar pælingar.. mjög furðulegt.. eða jú ég er geðveikt pirruð á einu. Alltaf á morgnana þegar ég er nývöknuð og ligg uppí rúmi þá finn ég reykingarfnyk koma inn um gluggann! Þá lít ég út og enginn sjáanlegur.. þannig að ég er farin að halda að kellingin fyrir neðan sé að reykja útúm gluggann sinn og það fjúki beint inn um minn.. ég þori samt ekkert að spyrja hana!

Svo í morgun kl. 7 var einhver fýr fyrir utan að ræskja sig á milljón og hrækja og sorry en ég er geðveikt viðkvæm fyrir svona kokhljóðum annarra núna.. kúgast alveg. Svo fór hann að tala í símann geðveikt "ertu ekki að koma að sækja mig? Ég er fyrir utan hjá Gumma og Lindu! Ertu ekki að fara að koma gamla belja!?!" Hvað er að fólki? Ég ætlaði aldrei að sofna aftur, þar sem ég mátti sofa til 8.30! :(

En ég er búin að jafna mig! - Með taaaaaaaauuuugarnar þandar, titrandi andar, kjökrandi smýgur, skjálfandi lýgur og tíminn líííður!

Jæja best að skrifa eitthvað hérna.. það er allavega búið að vera gaman að lesa allar hamingjuóskirnar hérna, takk fyrir þær allar!
Það er nú ekki margt búið að gerast síðan síðast.. ég er alltaf svo uppgefin eftir vinnu að mér finnst best að fara bara heim og hvíla mig þangað til ég fer að sofa, en mér skilst að ég eigi að fá eitthvað orkutímabil núna á næstunni, skv. einhverri af þessum meðgöngusíðum, maður getur sko alveg lesið um allt sem maður vill á þessu neti. Það er víst eitthvað annað en í den skilst mér.
Annars er þetta mjög undarleg tilfinning að það skuli vera lítil mannvera að sprika inní maganum og maður er ekkert farinn að finna fyrir henni... þótt að barnið sé nú aldeilis búið að láta vita að það sé þarna með öðrum einkennum eins og ógleði, uppköstum og fleiru! En það gleymist jafnóðum þar sem þetta er svo gaman! :)

En ég ætla nú ekki að fara að breyta blogginu mínu í meðgöngublogg, en það er náttúrulega það sem er efst í huganum hjá manni um þessar mundir.

Við skötuhjúin fórum í leikhús á laugardaginn á Viltu finna milljón? sem var mjög skemmtilegt, endalaus vitleysa og grín og ekki spillti fyrir að 3 af uppáhalds leikurunum leika í því, eða þau Helga Braga, Eggert Þorleifs og Laddi. Ég mæli allavega með því fyrir fólk sem fílar svona grínfarsa, en ekki fyrir fólk sem fílar kjötfarsa.. aaaaahahahaha geðveikt fyndið!

Svo er ég nú að verða þrítug eftir nokkrar vikur.. og ég er búin að vera að velta því dáldið fyrir mér hvernig ég eigi að halda uppá það. Ég ætla allavega ekki að hafa partí.. og þá er þetta orðið dáldið "dull" eða haddló.. ég meina, á ég að hafa kaffisamsæti í sal eins og ég sé að verða sjötug? Ekki get ég haft karókípartí og engin "söngolía" í boði.. það myndi enginn syngja, jú nema ég! Þannig að allar uppástungur eru vel þegnar! :)

Jæja best að fara að horfá mellið með lausu l-i ... mér finnst alltaf jafn fyndið í Melrose þegar konan með labradorinn hleypur framhjá húsinu og þegar gaur í hlýrabol og ýkt stuttum gallastuttbuxum er að þrífa laugina! :)

(þetta var skrifað í gærkvöldi, en bloggerinn var bilaður allt kvöldið)